Тизер трејлерот за биографскиот филм „Мајкл“ (Michael), посветен на животот и музичкото наследство на Мајкл Џексон, постави нов рекорд во филмската индустрија. За само дваесет и четири часа од објавувањето трејлерот собра 116.2 милиони прегледи и стана најгледаниот трејлер во историјата на студиото „Лајонсгејт“, но и најуспешниот тизер некогаш направен за музички биографски или концертен филм, според податоците на „Вејв метрикс“.

Овој резултат го постави „Мајкл“ над сите досегашни рекордери. Филмот „Тејлор Свифт: турнејата ‘Ерас’“ (Taylor Swift: Eras Tour) достигна 96.1 милион прегледи во првиот ден, „Боб Марли: Една љубов“ (Bob Marley: One Love) 60.1 милион, а зад него останаа и „Боемска рапсодија“ (Bohemian Rhapsody) со 57.6 милиони и претстојниот биографски филм за Боб Дилан, „Целосно непознат“ (A Complete Unknown), кој собра 47.2 милиони.

Тизер-трејлерот за „Мајкл“ беше објавен утрото, паралелно со финансиските резултати на студиото, и за само шест часа надмина триесет милиони прегледи ширум светот, што е околу педесет проценти повеќе од резултатот на „Џон Вик 4“ (John Wick: Chapter 4) во истото време.

Филмот го режира Антоан Фукуа, а главната улога му е доверена на Џафар Џексон. Во актерската екипа се и Нија Лонг како Кетрин Џексон, Колман Доминго како Џо Џексон и Мајлс Телер во улога на адвокатот Џон Бранка. Сценариото е на Џон Логан.

Премиерата на филмот е закажана за 24 април 2026 година.

ВИДЕО | Објавен е првиот трејлер за контроверзниот биографски филм за Мајкл Џексон