Филмската програма на 11. „Ехо“ – фестивал на планински филм содржи 29 остварувања на автори од 15 земји. Фестивалот се одржува од 5 до 9 октомври во кино „Милениум“ и во кино „Фросина“ во МКЦ. Организаторите годинава биле ставени пред голем предизвик, но сепак одлучиле фестивалот да ја задржи класичната форма, а без лично присуство на интернационални или домашни гости во форма на предавања и презентации.

Во натпреварувачкиот дел составени се комисии во повеќе категории. Филмското жири е во состав Јержи Порембски (Полска), Рус Вакрилов (Бугарија) и Илија Циривири (Македонија). За наградата од програмата посветена на екологијата ќе одлучуваат членовите на Македонското еколошко друштво (МЕД): Славе Наќев, Данка Узунова и Александар Павлов. Комисијата за избор на најдобра планинска фотографија на тема „Македонија – прекрасна“ е во состав Горан Кузмановски, Александар Дончев и Алесио Ликуори.

Влезот на филмските проекции е бесплатен, но задолжително е почитувањето на протоколите за заштита од коронавирусот и резервирањето на билетите онлајн или преку билетарницата на МКЦ.

(Текстот е објавен во „Културен печат“ број 51, во печатеното издание на „Слободен печат“ на 3-4 октомври 2020)