Рожер Федерер со победа го започна настапот на УС Опен, Швајцарецот потешко од очекувањата со 3:1 во сетови и за два и пол часа го совлада индискиот тенисер Сумит Нагал.
Изненадувачки, 190. тенисер на АТП ранг листата го освои првиот сет со 6:4, но одговорот на Федерер беше експресен. Во преостанатите три сета, Швајцарецот на својот противник му дозволи да освои само седум гемови и рутински со 6:1,6:2,6:4 го реши дуелот во своја корист.

И вториот Швајцарец, Станислас Вавринка загуби сет во првото коло. Вавринка со 6:3,7:6,4:6,6:3 беше подобар од Јаник Синер од Италија.

Кај дамите, во дуелот помеѓу грен слем шампионките, Серена Вилијамс ја прегази Марија Шарапова. Серена и препушти на Шарапова само два гема (6:1,6:1) и ја оствари 20. победа во меѓусебните дуели.
Сигурен старт имаше и победничката на Мастерсот во Синсинати, Медисон Кис која со 7:5,6:0 ја елиминира Јапонката Мисаки Дои.