Ѓорче Петров-ЖРК е запрен во осминафиналето на Европскиот куп, откако на реваншот загуби со 22:30 од полскиот тим на Јарослав.

Потсетување дека на првиот дуел одигран во петокот, во салата „Автокоманда“ – Скопје македонската екипа славеше минимално со 27:26, резултат кој даваше надежи дека може да се најде меѓу најдобрите осум во ова ЕХФ клупско натпреварување.

Инаку добро почна натпреварот за ѓорчепетровки, стекнаа предност од 2:0, возврати ривалот со серија од 2:3, па се врати нашиот претставник со минимално водство од 4:3, а својата последна позитива ја имаше од 5:4.

Потоа, како да играше само еден тим на паркетот, многу подобро одигра противникот кој до крајот на првото полувреме постигна осум, а прими само два голови (7:12).

Ништо не се промени резултатски во вториот дел, полските ракометарки ја одржуваа предноста која од минута во минута растеше. Највисоката позитива Јарослав ја имаше од дури „плус 11“ (16:27).

Најефикасна во редовите на Ѓорче Петров-ЖРК беше Анастасија Николовска со пет голови, а по четири имаа Ана Марија Коларовска и Милица Николиќ.