Во последниот 10. натпревар од регуларниот дел во СЕХА Газпром лигата, екипата на Еурофарм Работник триумфираше на гостувањето кај Спартак Москва со 21:33 (11:19).

Најефикасен во победничките редови беше Е. Граџан со седум голови, следен од М. Ѓукиќ со пет, а во рускиот тим шест голови беа дело на Е. Воиниуш.

За Еурофарм Работник се истакнаа и голманите, Н. Митревски собра 10, а Г. Чаневски осум одбрани. На тој начин битолската екипа ја прекина долгата негативна серија во регионалното натпреварување од шест порази по ред.

Со овие бодови ја обезбедија четвртата позиција во групата „Б“ и во осминафиналето според најавите ќе играат против Нексе од Хрватска. Дуелите ќе се одиграат на 1/2 февруари и 11/12 февруари 2020 година.

Победникот од тој меч во четвртфиналето ќе ги одмери силите против актуелниот регионален шампион Вардар на 7/8 март и 14/15 март 2020 година.