Шефицата на европската дипломатија, Каја Калас, денеска ја отфрли можноста поранешниот германски канцелар Герхард Шредер да биде назначен за преговарач на блокот во евентуални мировни разговори за Украина, објави „Јуроњуз“.

Рускиот претседател Владимир Путин во саботата предложи Шредер да дејствува како европски посредник во идни преговори, тврдејќи дека конфликтот „се движи кон крајот“.

Меѓутоа, Калас го отфрли предлогот во изјава за новинарите пред состанокот на министрите за надворешни работи на ЕУ во Брисел.

– Првин, ако ѝ дадеме на Русија право да назначува преговарач во наше име, тоа не би било многу мудро. Второ, мислам дека Герхард Шредер фактички беше лобист на високо ниво за руски државни компании – рече Калас.

На војната во Украина ѝ се ближи крајот, вели Путин

Шефицата на европската дипломатија додаде дека претпочитањето на Путин за Шредер би значело дека „тој фактички би седел на двете страни од масата“.

Шредер одржува блиски врски со Путин откако ја напушти функцијата. До 2022 година беше член на одборот на рускиот нафтен гигант „Роснефт“, а имаше и функции во други руски државни енергетски компании, меѓу кои „Норд стрим АГ“ и „Газпром“.

Предлогот на Путин беше отфрлен и од Украина, а низ Европа наиде на мешани реакции.

Запрашан денеска дали Киев го поддржува Шредер како можен посредник, украинскиот министер за надворешни работи Андриј Сибиха одговори: „Не, не го поддржуваме“.

Во меѓувреме, портпаролот за надворешни работи на германската Социјалдемократска партија во парламентот, Адис Ахметовиќ, изјави дека предлогот треба „внимателно да се разгледа“ заедно со европските партнери, според германскиот медиум „Шпигел“.

Марта Кос: „Во ЕУ има место за сите земји од Западен Балкан“