Европските пратеници денес поддржаа построги контроли врз увозот на земјоделски производи од земјите од Меркосур, јужноамериканскиот трговски блок чии полноправни членови се Аргентина, Бразил, Парагвај и Уругвај. Европскиот парламент гласаше дека суспензијата на привилегираниот пристап до европскиот пазар за производи од Меркосур е можна ако увозот се зголеми за повеќе од пет проценти годишно или цените паднат за ист износ, објавува Ројтерс.

Покрај тоа, парламентот го скрати времето за истрагите што проверуваат дали увозот од Меркосур ги надминува дозволените квоти или не ги исполнува стандардите на ЕУ, објавува Ројтерс. Целта на пократките истраги е побрзо да се применат сите заштитни мерки, со цел да се заштитат земјоделците во ЕУ од ненадејно и потенцијално штетно зголемување на увозот.

Тоа е заострување во споредба со претходниот механизам на Европската комисија, која предложи суспензија ако увозот од Меркосур се зголеми за повеќе од 10 проценти годишно или цените паднат за ист износ. Пратениците исто така сакаат можноста за суспензија на увозот да се примени во случај производите да не ги исполнуваат стандардите на ЕУ, на што особено инсистираше Франција. Одлуката на парламентот сега води кон преговори со Советот на ЕУ, кој го поддржа оригиналниот праг на суспензија од 10 проценти, а разговорите се очекува да започнат уште утре.

Промените ги одложуваат плановите на претседателката на Европската комисија, Урсула фон дер Лајен, да го потпише договорот со Меркосур во Бразил, бидејќи поддршката од сите членки на ЕУ е неопходна за финализирање на договорот- објави Бизнистелеграф.