ЕУ би можела да го изгуби Западен Балкан
Унгарскиот министер за надворешни работи Петар Сијарто денеска изјави дека доколку Европската унија не преземе навремени чекори во врска со проширувањето, може да го изгуби Западен Балкан, слично на Велика Британија.
На маргините на состанокот на министрите за прашања на ЕУ во Луксембург, Сијарто рече дека политиката на проширување е една од најважните политики на ЕУ, пренесува унгарската агенција МТИ. Според него, Унијата ќе води „политика спротивна на нејзините интереси“ доколку не ги забрза пристапните разговори со Србија и Црна Гора и го одложи почетокот на преговорите со Македонија и Албанија.
“Натпреварот за интеграција на Балканот и вршењето влијание во регионот е во тек. Иако ЕУ има најголеми шанси за победа, земјите од регионот го избраа европскиот пат. Трансатлантскиот правец на регионот не смее да се земе здраво за готово “, рече Сијарто.
Тој посочи дека на ЕУ и е повеќе потребен Западен Балкан отколку на Западен Балкан и додаде дека загубата на тој регион може да биде реално сценарио за ЕУ во случај на долгорочен ќор-сокак.
Сијарто исто така рече дека Србија и Црна Гора треба брзо да се интегрираат, а преговорите со Албанија и Македонија треба да започнат наскоро.