Ерменија побара воена помош од Русија поради тензиите со Азербејџан
Ерменскиот премиер Никол Пашинијан изјави денеска дека побарал воена помош од рускиот претседател Владимир Путин во услови на тензии со Азербејџан по вооружениот конфликт во регионот Нагорно Карабах.
Тензиите меѓу двете соседни земји во Јужен Кавказ се зголемија оваа недела кога Ерменија протестираше против, како што рече, упадот на азербејџанските трупи на нејзина територија.
Азербејџан инсистира на тоа дека неговите војници биле распоредени на територијата што ја смета за своја во погранична област. Пашинијан им порача на пратениците дека во телефонски разговор со рускиот претседател побарал од Путин да и обезбеди воена помош на Ерменија. Русија официјално не ја коментираше изјавата на Пашинијан.
По повод вчерашниот разговор меѓу Путин и Пашинијан, Кремљ објави дека рускиот лидер ја нагласил потребата од почитување на примирјето и решавање на сите спорни прашања со дипломатски средства.
Русија има воена база во Ерменија, која е членка на Организацијата за договор за колективна безбедност предводена од Москва. Во исто време, Кремљ се обидува да ги одржи пријателските врски со Азербејџан, земја богата со нафта.
Азербејџан и Ерменија во ноември минатата година потпишаа договор под покровителство на Русија, со кој се стави крај на жестоките конфликти во Нагорно Карабах.
Извор: Бета