Англискиот фудбалски клуб Манчестер сити денеска го потврди назначувањето на Енцо Мареска за нов менаџер. Италијанецот потпиша тригодишен договор до летото 2029 година.

За Мареска ова ќе биде неговиот трет престој во клубот, а тој доаѓа со богато искуство и успех на елитно ниво.

– Манчестер Сити е клуб што го познавам многу добро и шансата да го водам овој тим е одлична можност за мене. Ги знам барањата, очекувањата. Сити е неверојатно добро управуван фудбалски клуб. Сè што прават е иновативно, планирано и одлучно. Тоа ми ја обезбедува конзистентноста што ми е потребна за ефикасно да ја извршувам мојата работа. Квалитетот на луѓето што работат тука е она што го прави толку посебен овој клуб и сакам да им се заблагодарам што покажаа доверба во моите способности. Едвај чекам да почнам да ги тренирам играчите. Сакам да победуваме, да играме добар фудбал – рече Мареска за клупскиот сајт.

Тој ќе го наследи Пеп Гвардиола на клупата, кој неодамна ја заврши најуспешната ера во историјата на клубот.

Мареска го напушти Челси на почетокот на годината, а сега се враќа на „Етихад“, каде што веќе работеше како член на стручниот штаб на Гвардиола од 2022 до 2023 година. Пред тоа, тој ги водеше и младинските тимови на клубот, па затоа добро го познава работниот систем на „Граѓаните“.

The man for the occasion 😮‍💨 pic.twitter.com/2SUz05uByV

— Manchester City (@ManCity) June 29, 2026