Екстра засилување за Металург, хрватското легендарно крило Хорват доаѓа во Автокоманда
Хрватскиот ракометен репрезентативец Златко Хорват, по 18 години играње за Загреб, летово се одлучи да си замине и негов нов клуб е поранешниот македонски шампион Металург.
Хорват целата кариера ја помина во Загреб, а со репрезентацијата на Хрватска има медали од Олимписките игри во Лондон 2012 (бронза), од Светските првенства (2009-сребро и 2013-бронза) како и од Европските првенства (2008 и 2020 сребро, а 2012 и 2016 бронза).
Хорват беше дел од хрватската репрезентација која во јануари загуби од Шпанија во финалето кое го судеше најдобрата македонска двојка Ѓорѓи Начевски и Славе Николов.
Металург со ангажманот на Хорват уште еднаш покажа дека има големи амбиции за следната сезона каде се очекува да го има главниот збор заедно со Вардар и со Еурофарм Пелистер.
Претходно тимот од Автокоманда се засили и со Никола Потиќ, Момир Рниќ и Бранко Канкараш, додека виси трансферот на Енрике Тешеира.