Европската ракометна федерација (Европска ракометна федерација – ЕХФ) ја поништи номинацијата на македонските арбитри Славе Николов и Ѓорѓи Начевски, со што тие останаа без можност да делат правда на Европското првенство што ќе се одржува од 15 јануари до 1 февруари.

Од ЕХФ информираа дека за време на подготовките за шампионатот сите судиски двојки мора да ги исполнат строгите критериуми, меѓу кои и задолжителниот фитнес-тест. Во случајот на Николов и Начевски, од „Куќата на ракометот“ посочуваат дека постои сомнеж дека фитнес-тестот бил лажиран, поради што тие се суспендирани од претстојното Европско првенство.

„Процедурата е воспоставена со цел да се гарантира физичката подготвеност на судиите и нивната усогласеност со перформансните стандарди на турнирот. Таа предвидува доставување две видео-снимки од таканаречениот мултистејџ фитнес-тест – една осум, а друга четири недели пред почетокот на ЕХФ ЕУРО. Снимките ги оценува фитнес-партнерот на ЕХФ, компанијата Fitgood Pro“, соопшти федерацијата.

По добиените видеа од Николов и Начевски, ЕХФ кон крајот на декември добила информација дека материјалот можеби бил изменет и дека не претставува целосен и автентичен запис од тестирањето. Поради тоа, видеата биле подложени на дополнителна експертска анализа од ,,Fitgood Pro” а истовремено биле доставени и до интегритетниот партнер на федерацијата.

Од Европската куќа на ракометот најавија дека случајот сè уште не е затворен, дека ќе следи дополнителна истрага и дека јавноста ќе биде навремено информирана за сите нови детали.