Фестивалот на нова музика „Здраво млади!“, кој веќе 11 години се одржува во организација на Младинскиот културен центар во Скопје, годинава ќе има еднодневно издание на 27 август во МКЦ Парк.

– На фестивалот ќе настапат миленикот на скопската публика „Hercules & Love Affair“ (диџеј сет на Енди Батлер), најсвежиот руски звук „Шортпарис“, грувот на векот концентриран во Мурман Цулаѕе, домашните „Искра“ и „Блекстејт“, шпанските постпанкери „Белградо“, мистичниот романтик Пеки Пеле, најтазе бендот од македонската алтернативна сцена „Луфтханза“, белградските „Коикои“ и единствениот Ирец од македонската дијаспора диџеј Фиц – посочија од МКЦ.

Претходно беше планирано дводневно издание на фестивалот, но откажувањето на настапот на „Вјагра бојс“ и на Нога Ерез поради пандемијата на коронавирусот ги променија плановите на организаторот.

Покрај музичката програма, дел од „Здраво млади!“ ќе биде и ликовната изложба „Маска или преобразба на изопаченото“ на младата уметница Бранкица Јордановска. Изложбата е составена од серија на графики, цртежи и објекти карактеристични за уметноста на Јордановска. Изложбата ќе биде поставена во рамките на фестивалскиот простор во паркот зад МКЦ.

Фестивалот е поддржан од Делегацијата на Европската Унија во Скопје и Europe House Skopje.

(Текстот е објавен во „Културен печат“ број 94, во печатеното издание на „Слободен печат“ на 21-22 август 2021)