Францускиот тим Бордо се наоѓа пред исфрлање во понизок ранг на натпреварување поради финансиски проблеми. Имено, Националното одделение за контрола на менаџментот (ДНГГ) во наредните денови ќе соопшти дека Бордо поради лошо раководење ќе биде преселен во Лига 2.

Клубот ќе добие рок до 13 јули да ја промени сопственичката структура, а како потенцијален купувач се споменува Жерар Лопез кој има можност да го заврши преземањето на клубот и потоа да се појави пред ДНГГ со што би се поништила одлуката за преселба во втората француска лига.
Бордо е еден од најтрофејните француски клубови, тие шест пати ја освојувале титулата во Лига 1, а последен пат во 2009 година. Згора на тоа има и 10 титули во францускиот Куп, Лига Купот и францускиот Суперкуп. Минатата сезона Бордо ја заврши на 12 место со 45 освоени бодови.