Американскиот актер Ноа Вајл вчера во Лос Анџелес ја доби својата ѕвезда на Патеката на славните во Холивуд, со што го одбележа еден од најважните моменти во својата кариера, а на свеченоста беше придружуван од своето семејство. На церемонијата беа неговата сопруга Сара и нивните три деца, кои му пружија поддршка во овој важен животен момент.

За време на говорот, Вајл упати емотивни зборови на благодарност до своето семејство, истакнувајќи колку тие му значат во животот и во кариерата.

Посебно им се заблагодари на сопругата и на децата, нагласувајќи дека тие се неговата најголема мотивација.

„Мојата сопруга Сара и моите три прекрасни деца, Овен, Оден и Френсис се мојот север, југ, исток и запад. Вие сте причината поради која станувам наутро. Вие сте мојата мотивација да се трудам повеќе. Вие сте изворот на мојата креативност. Ви благодарам за инспирацијата и за тоа што на мојот живот му дадовте смисла и дефиниција“, порача актерот.

Иако со децении е присутен на телевизијата и на филмот, Вајл во последните години повторно бележи пораст на популарноста, а новото внимание кај публиката му го донесе серијата „Пит“.

Минатата година, во разговор за списанието „Пипл“, Вајл изјави дека токму неговите деца му откриле дека јавноста повторно го доживува како „омилен шармер“. На прашањето дали им е непријатно што нивните пријатели можеби имаат симпатии кон нивниот татко, тој рече дека тие не го сфаќаат тоа сериозно и дека повеќе им е забавно отколку непријатно. Додаде и дека децата често го задеваат поради тоа, бидејќи знаат дека таквото внимание му е помалку непријатно и дека самиот не се снаоѓа најдобро во оваа нова популарност.