Тара Рид (50), најпозната по улогата на Вики Латам во „Американска пита“, поднела полициски извештај до Одделот за јавна безбедност во Роузмонт на 25 ноември и е „подготвена да поднесе тужба“ откако наводно била дрогирана во бар во хотел, пренесува „Фокс Њуз“.

Според полицискиот извештај, актерката тврди дека „целосно ја изгубила свеста“ откако непозната личност наводно го „допрела“ нејзиниот пијалак во хотелот „DoubleTree“ во Роузмонт, Илиноис. Рид изјавила дека во фоајето имало „многу луѓе кои наводно биле Јутјубери“.

„Повеќето од нив држеа телефони во рацете и целата ситуација ми изгледаше сомнително, но не знаев што се случува“, рекла таа. Рид се присетила дека нарачала чаша бело вино пред да ѝ пријде „многу успешен инфлуенсер и Јутјубер“ по име Шон П. и да се претстави.

Рид вели дека заедно излегле да запалат цигара и подоцна размениле телефонски броеви.

„Кога се вратив во барот, на мојот пијалак имаше салфетка. Последното што се сеќавам е дека го испив тоа пијалак и видов еден пар што седеше до нас. Следното нешто што го паметам беше будењето во болница околу 8 или повеќе часа подоцна, без никаква претстава каде сум или што се случило. Целосно ја изгубив свеста и ништо не паметам“, ѝ рекла таа на полицијата. Во извештајот стои дека властите пристигнале на местото околу 00:39 часот.

Според извештајот, инфлуенсерот што го запознала наводно следниот ден ѝ испратил снимки, што таа го сфатила како обид за уцена.