Основното јавно обвинителство Скопје поведе постапка против две државјанки на Република Бугарија кои се осомничени за повеќекратни кражби и за злоупотреба на украдени банкарски картички на подрачјето на Скопје.

Првата осомничена во пет наврати, од кои последниот пат заедно со второосомничената, крадела паричници од различни луѓе, во кои покрај пари имало и банкарски картички од кои потоа се обидувале да повлечат уште пар.

„Така на 4 април 2025 година, во автобус бр.7 на ЈСП-Скопје, на релација од поликлиника Букурешт до Рекорд, осомничената украла паричник во кој имало 2.600 денари, банкарска картичка и други документи, а кога оштетениот се јавил да ја блокира сметката од банка му кажале дека од банкомат веќе му биле подигнати 30.000 денари. Во текот на август 2025, во трговски центар во Скопје, трипати вршела кражби на паричници во кои имало документи, картички, пари и други вредни предмети со што првично прибавила противправна имотна корист од 39.000 денари. Потоа од картичките се обидувала да извлече уште пари, што кај една оштетена и успеало и од банкомат на двапати и повлекла од сметката вкупно 60.000 денари. Последниот пат на 4 јануари 2026 година двете осомничени заедно, повторно во продажен објект на трговски центар, украле паричник од оштетена и други предмети во вкупна вредност од 3.000 денари, а потоа двапати неуспешно се обидувале од банкомат да повлечат пари од сметката на оштетената,“ соопшти Обвинителството.

Бидејќи во конкретниот случај постојат индиции дека осомничените во двата успешни обиди за повлекување пари од украдените картички користеле ПИН кодови кои жртвите, повозрасни луѓе, ги чувале запишани во своите паричници, јавниот обвинител презема дејствија за да испита дали осомничените исполниле и елементи на кривично дело – Оштетување и неовластено навлегување во компјутерски систем.

За осомничените е предложена мерка притвор.