Двајца пациенти во последните неколку недели починале во слични околности во Клиничката болница „Свети Дух“ во Загреб, оставени да лежат на транспортни колички во чекалната на ургентното одделение, пишува „Индекс“.

Едниот пациент бил пронајден мртов во чекалната од членовите на семејството, другиот од екипа на брзата помош.

Како што дознава „Индекс“, и двајцата пациенти биле примени во итната медицинска помош, по што биле ставени на лежечки транспортни колички и оставени да чекаат во чекалната, бидејќи немало слободни кревети.

Првиот случај се случил ноќта меѓу 20 и 21 февруари. Станува збор за пациент кој бил оставен во чекалната и кој утрото бил пронајден мртов од членовите на неговото семејство.

Неколку дена подоцна, имало сличен случај и со друг пациент. Откако му била укажана помош, за пациентот, кој исто така чекал во чекалната, повторно била повикана брза помош. Вработените во медицинскиот транспорт го пронашле човекот мртов. Во двата случаи смртта на пациентите најпрво ја забележале надворешни лица, односно семејството на починатиот и вработените во медицинскиот транспорт, а дури потоа персоналот во болницата.

Од болницата велат дека немало лекарска грешка во случаите.