Министерството за внатрешни работи (МВР) потврди дека двајца луѓе ги загубиле животите во тешката сообраќајната несреќа што се случи попладнево кај манастирот „Свети Јован Бигорски“ на патот Маврово-Дебар, кога автомобил паднал во реката Радика.

Загинале возачот и сопатникот во автомобилот „Фолксваген Бора“ со гостиварски таблички. Увидот на местото на несреќата е во тек, велат од МВР.

АМСМ претходно извести дека од 18:30 часот е целосно затворен патот Маврово-Дебар, поради извлекувањето на автомобилот од реката.

Центарот за управување со кризи попладнето соопшти дека сообраќајната несреќа била пријавена во 15:48 часот, а пријавителот во телефонски разговор со службениците рекол дека автомобилот се движел со голема брзина и возачот загубил контрола, почнал да се лизга на коловозот, по што се превртело и паднало во реката Радика, во близина на манастирот.