Два концерта на „Луфтанза“ и „Харакири“ ќе се одржат во кафе и филм „Котур“
Младата музичка група „Луфтанза“ својата регионална турнеја ја завршува со два интимни концерта во кафе и филм „Котур“ на 5 и 6 април, од 21 часот. За загревање ќе настапи, исто така, младата музичка група „Харакири“, која беше дел од турнејата, која ги опфати Белград, Нови Сад, Зрењанин, Суботица, Будимпешта, Загреб и Љубљана.
„Луфтанза“ се млад македонски бенд со експериментален и агресивен дух, кој спојувајќи ја својата гласност, лутина, љубов и агресија контрираат на жанровските определби, еднодимензионалноста и конформизмот на фабричката еднолична музика.
Шестте испотени другари кои свират и напорно работат во својата неклиматизирана гаража од почетокот на пандемијата, со четири албуми под своето име, се Виктор Стојановски на тапани, Раде Биковски (бас), Мартин Џорлев (вокал и гитара), Андреј Димовски (гитара и вокал), Иво Николовски (гитара, синт и понекогаш вокал) и Лука Јовановски (гитара и вокал).
Бендот „Харакири“ е формиран во 2022 година како трио од Скопје. Членови на бендот се Андреј Димовски – гитара и вокал, Марко Печеновиќ – бас и вокал и Виктор Стојановски – тапани.
Музиката што ја создаваат се движи во границите на алтернативниот рок. Првиот сингл што го објавија на Јутјуб е со наслов „Спротивниот крај“, а спотот е снимен на улиците во населбата Карпош 1 во Скопје.
Поради ограничениот капацитет, во продажба се само 80 билети, кои може да се набават во кафе и филм „Котур“. Концертот на 5 април веќе е распродаден.