Дуда му даде можност на Моравјецки да формира влада, но шансите за тоа се минимални
Полскиот претседател Анджеј Дуда изјави дека ќе му ја даде на актуелниот премиер Матеуш Моравјецки првата можност да формира нова влада по изборите пред три недели.
Неговата партија Право и правда (ПиС) освои 194 места и се соочува со тешка потрага по сојузници за да достигне мнозинство од 231. Три проопозициски партии, предводени од поранешниот премиер Доналд Туск, освоија 248 места, потсетува Би-Би-Си.
Ако Моравјецки не успее да обезбеди доволно сојузници, на Туск би можело да му се даде шанса да собере мнозинство наместо тоа. Моравјецки е лидер на владејачката партија Право и правда (ПиС), која беше прва на изборите за Сејм, долниот дом на парламентот, минатиот месец, но е далеку од мнозинство. Сите други партии во парламентот ветија дека нема да го поддржат ПиС.
По претходните избори, најголемата партија ја добиваше првата можност да се обиде да формира влада. Но, со оглед на тешкотиите со кои ќе се соочи Моравјецки да обезбеди мнозинство, опозицијата тврдеше дека на Туск треба да му се даде можност да договори коалиција.
Дуда, сојузник на ПиС, ја донесе одлуката по консултациите со секоја партија претставена во парламентот. Граѓанската коалиција (КО) на Туск и двајцата сојузници, Третиот пат и Левица, имаат удобно мнозинство.
ПиС е на власт од 2015 година. Во тоа време, Полска често се расправаше со ЕУ за прашања како што се владеењето на правото и правата за абортус. Вкупно 36 милијарди евра од фондовите на ЕУ наменети за Полска беа блокирани од Брисел поради загриженоста дека владата на ПиС го поткопува владеењето на правото.
Претходно овој месец, Моравјецки рече дека верува оти одлуката на Уставниот трибунал за забрана на абортусот во речиси сите случаи – издадена како одговор на барањето на пратениците на ПиС – била „грешка“.