Меѓународната федерација на професионални фудбалери, FIFPRO, ги објави победниците на годинешниот избор за „World 11“, еден од најпрестижните признанија за најдобрите фудбалери во светот.

Голман на идеалниот тим е Италијанецот Џанлуиџи Донарума, кој игра за Манчестер Сити (претходно ПСЖ) и имаше одлични интервенции во Лигата на шампионите.

Во одбраната доминираат играчи од европските гиганти: Вирџил ван Дајк (Ливерпул), Ашраф Хакими и Нуно Мендеш (двајцата од ПСЖ). Ова трио се покажа како цврсто и ефикасно, комбинирајќи физичка сила, брзина и техничка прецизност.

Во средината се наоѓаат талентирани и креативни играчи: Џуд Белингам (Реал Мадрид), Кол Палмер (Челси), Педри (Барселона) и Витиња (ПСЖ), кои беа клучни за креативните акции на своите тимови.

Нападот го сочинуваат „пеколната“ тројка: Усман Дембеле (ПСЖ), Килијан Мбапе (Реал Мадрид) и младата сензација Ламин Јамал (Барселона), чиј технички талент и брзина беа незаменливи во создавањето гол-шанси и постигнувањето погодоци.

Најмногу играчи во идеалниот тим се од францускиот ПСЖ, кој минатата сезона за првпат во својата историја го освои најпрестижниот европски клупски трофеј.

Преземено од: Sport.com.mk