Кривичниот совет на Основниот кривичен суд Скопје ги одби жалбите и ја потврди мерката притвор од 30 дена за в.д. директорот на ЈП „Комунална хигиена“, Сабахадин Рустеми, и управителот за отпад во јавното претпријатие, Аки Саити.

Притворот беше определен на 28 октомври по предлог на Основното јавно обвинителство (ОЈО) Скопје, поради постоење на опасност од влијание врз сведоци и можност за повторување на делото.

Обвинителството ги сомничи двајцата за сторено кривично дело „Загрозување на животната средина и природата со отпад“ од член 230 став 1 од Кривичниот законик.

Осомничените постапиле спротивно на Законот за управување со отпад и на обврските од Оперативната програма за собирање и транспортирање на комунален отпад.

Ова резултирало со создавање на мали депонии на јавни и сообраќајни површини во Скопје.

Вонредните инспекциски надзори и експертското мислење од Институтот за јавно здравје потврдиле дека ваквото управување со отпадот предизвикало оштетување на почвата, воздухот и водата, со потенцијална опасност по здравјето на граѓаните.