Издавачката куќа „Антолог“ од Скопје го најави седмото издание на Фестивалот на европската литература „Букстар“ (Книжевни ѕвезди), кој ќе се одржи од 12 до 15 октомври во Младинскиот културен центар.

Под слоганот „Генрезис“ (Genresis), фестивалот „Букстар“ оваа година ги поставува прашањата: Дали ковид-19 е најопипливата апокалиптична форма на цивилизацијата досега? Вител во кој ќе исчезнуваме, дел по дел? Или сме исправени пред поглавје на повторно раѓање на човештвото? Втор „Генезис“ (Genesis)? И како литературата ќе си го најде своето место во овие застрашувачки моменти? Ќе треба да најде автохтон дискурс, или судбината ѝ е веќе испишана? Нови жанрови (Genres)?

Европската литература како никогаш досега посегнува по своите деконструирани и раскршени крилја. Затоа, ќе мора да креира, реплицира, колекционира, конгруира. Тука, меѓу дискрепанцата на спротивставените жанрови во настанување или не-станување, се подига нов збор – „Генрезис“. Зборот беше почеток, може ли сега да биде – крај? – загатнуваат организаторите на фестивалот.

Различностите ќе надвладуваат, а оваа година пред македонската публика со лично присуство во Скопје на фестивалот ќе бидат претставени дури девет автори: Катарина Винклер (Австрија), која со романот „Модар накит“ го сврте вниманието на книжевната јавност, а учествувала и во театарски и филмски продукции; Влада Урошевиќ (Македонија), како еден од најпродуктивните и најквалитетни македонски писатели; Огнен Спахиќ (Црна Гора), наградуван автор, чии книги се преведени на десетина јазици; Сјон (Исланд), романсиер и поет, кој е вистинска книжевна ѕвезда во европската литература; Миодраг Мајиќ (Србија), двигател на промените во српското правосудство кој доаѓа во Скопје како автор на два врвни и омилени романи; Балсор Хоџа (Косово), автор на неколку книги и познат и влијателен публицист; Марина Вујчиќ (Хрватска), подеднакво активна и во театарот и во книжевноста, моментално ја извршува функцијата директорка на драмата во Хрватскиот народен театар во Сплит; Софија Лундберј (Шведска), име што уште со романот „Црвениот адресар“ стана меѓународна сензација; и Михаела Гашпар (Хрватска), чие примарно занимање била скулптурата, но подоцна се предава само на литературата.

Во фокусот на фестивалот, како и секоја година, ќе бидат промоциите на нивните дела. Покрај овие настани од главната програма, организаторите најавуваат и тркалезна маса на тема „Превод/ комуникација/ разбирање“, настан во чест на 100-годишнината од раѓањето на Станислав Лем, книжевна дискусија на тема „Книжевни жанрови: систем или креативен хаос“, работилница за креативно пишување од страна на Сјон, книжевно читање „Ти реков, ми рече“, познатиот книжевен поткаст „Гол ручек“ во живо, Саем на европската литература и многу други содржини.

Дизајнот на официјалниот фестивалски постер и на другите промотивни материјали е на Стефан Танков, а настанот е организиран во соработка со Младинскиот културен центар, каде што ќе се одржат фестивалските настани.

Фестивалот е поддржан од Делегацијата на Европска Унија во Република Северна Македонија, Министерство за култура, мрежата „Традуки“, Градот Скопје, Амбасадата на Австрија, Амбасадата на Кралството Шведска, Амбасадата на Полска, Исландскиот книжевен центар, Младинскиот културен центар, Друштвото на писатели на Македонија и такси „Глобал“.

Влезот на сите фестивалски настани е бесплатен, но задолжителен е вакцинален сертификат. За време на Фестивалот, ќе бидат почитувани сите протоколи и заштитни мерки за превенција од ширење на ковид-19.

(Текстот е објавен во „Културен печат“ број 100, во печатеното издание на весникот „Слободен печат“ на 9-11 октомври 2021)