Центарот за современи уметности во Скопје извести за поставувањето на самостојната изложба на Методија Јованов со наслов „Рокстарс“ (Rockstars), која ќе биде отворена на 24 јули (петок), во 20:30 часот, во Мобилна/Монтажна галерија (локација: Парк на Франкофонијата).

Изложбата „Рокстарс“ ја истражува привлечноста на сликите што ја обликуваат современата имагинација. Насловот не се однесува само на музичарите, туку на пошироката култура на слава, желба и идеализирани идентитети. Преку слики што ги спојуваат поп-културата, митот и личната фантазија, изложбата создава простор во кој границите помеѓу реалното и замисленото стануваат неизвесни.

Наместо да понуди еднозначно толкување, „Рокстарс“ ги поканува посетителите да размислат за начинот на кој ги создаваме сопствените идоли и за сликите што го обликуваат нашиот поглед кон убавината, успехот и идентитетот.

Методија Јованов (Кавадарци, 1997) е македонски сликар. Дипломирал на Факултетот за ликовни уметности при Универзитетот „Св. Кирил и Методиј“ во Скопје во 2022 година, во класата на проф. м-р Благоја Маневски.

Неговата уметничка практика е насочена кон традиционалното сликарство, со особен интерес за поп-културата како визуелен и концептуален извор. Преку различни сликарски техники развива препознатлив израз што го дефинира како „одличен кич“ – критички осврт кон авангардата, концептот на „добар вкус“ и минималистичката естетика.

Јованов е член на ДЛУМ и ДЛУК и дел од неговиот опус беше претставен пред јавноста на две самостојни изложби во 2023 година: „Одличен кич“ во Музеј – Галерија во Кавадарци и „Бели лаги“ во Младинскиот културен центар во Скопје; како и десетици групни изложби и проекти низ државата во последните пет години.