Вакцината развиена од „BioNTech“ и „Pfizer“ се покажа дека делува против една од најзагрижувачките мутации со висок степен на преносливост на коронавирусот откриени во Велика Британија и Јужна Африка, според лабораториската студија спроведена од американскиот фармацевтски гигант.

Студијата на „Pfizer“ која сè уште не поминала научен преглед, а била спроведена во соработка со научници од Универзитетот во Тексас, покажала дека вакцината ефикасно го неутрализира вирусот со т.н. мутација на „N501Y“, што ги загрижило научниците затоа што е во клучна позиција на шилестиот протеин што го користи вирусот за да влезе во ќелиите.

„Мутацијата може да биде одговорна за поголема зараза и постои загриженост дека вирусот може да „избега“ од антителата кои се активираат од вакцината“, изјави Фил Дормицер, еден од главните научници на „Pfizer“.

Студијата е спроведена на примероци крв земени од луѓе кои примиле вакцина. Антителата биле во можност да го неутрализираат вирусот подеднакво ефикасно. Научниците велат дека ова откритие е важен чекор кон гарантирање на ефикасноста на вакцината против новите варијанти.

Дормицер вели дека е охрабрувачки што вакцината изгледа е ефективна против мутацијата „N501Y“, како и 15 други мутации што компанијата претходно ги тестирала.

Научниците планираат понатамошно истражување за да видат дали вакцината е ефикасна против други мутации на вирусот откриени во Велика Британија и Јужна Африка и се надеваат на резултати за неколку недели.

Сајмон Кларк, професор по клеточна микробиологија на Универзитетот во Ридинг, оваа недела изјави дека и двете верзии на вирусот имаат некои нови заеднички карактеристики, но се пронајдени голем број дополнителни мутации во јужноафриканскиот сој што претставуваат пообемни промени во протеинскиот скок.

Научниците велат дека вакцините „Pfizer“ и „Moderna“се потпираат на технологијата „messengerRNА“, која може да се прилагоди за побрзо справување со новите варијанти на коронавируси отколку другите платформи за вакцини со вклучување на новиот генетски код.

Пеи-Јонг Ши, професор по молекуларна биологија на Универзитетот во Тексас вели дека резултатот е „голема вест“, додавајќи дека тестирањето на вакцината против другите мутации ќе продолжи и понатаму.

„Треба да ги следиме новите промени во вирусот и да се осигураме дека остануваат потентно инхибирани од вакцината или терапевтските антитела… Но, ако тие студии покажат дека вакцината ја губи својата активност наспроти новиот вид, тогаш, мора да се разгледа можноста за промена на низата“, вели Ши.