Колку време ви е потребно за да сфатите дали сте заинтересирани за некого на првиот состанок? Многу луѓе ќе кажат дека чувството е речиси моментално и ќе ја отпишат личноста пред навистина да ја запознаат. Иако е вистина дека можете да почувствувате привлечност многу брзо, таа може да се развие и со текот на времето, пишува „Вајс“.

Според Џули Нгуен, сертифициран советник за врски во апликација за запознавање, повеќето луѓе ги донесуваат своите одлуки премногу брзо.

За да се справи со овој проблем со модерното запознавање, таа го создаде „правилото од 48 часа“, кое бара да си дадете два цели дена по првиот состанок за да одлучите дали сакате втор состанок.

– Правилото од 48 часа е за давање простор да донесете одлука. Пред да отпишете некого или да се согласите на втор состанок, дајте си два дена да размислите – објаснила таа.

– Наместо да анализирате секој детаљ, следете како вашите чувства се смируваат со текот на времето и што останува откако почетниот интензитет ќе исчезне. По 48 часа, проверете како се чувствувате и што ви кажува интуицијата за вториот состанок – додала таа.

Ако сакате да го пробате ова правило, Нгуен предлага да обрнете внимание на четири знаци во текот на тој дводневен период.

Во тој период, вели Нгуен, важно е да обрнете внимание на неколку знаци што можат да ви помогнат да одлучите дали да ја продолжите врската. Ако се чувствувате смирено и опуштено по состанокот, тоа е добар показател, бидејќи почетната „хемија“ често е комбинација од возбуда и несигурност, а не вистинска компатибилност.

– Честопати погрешно го толкуваме тој интензитет како привлечност, иако станува збор само за активирање на нервниот систем. Посигурен сигнал е смиреност и леснотија во врската – истакнала таа.

Исто така е важно да забележите што ви останува во умот – не само впечатокот, туку и специфичните детали за личноста. Ако сè уште се сеќавате на нивните шеги или размислувате за нивните ставови, тоа би можело да укаже на вистинска врска.

Слично на тоа, љубопитноста по состанокот е добар знак: ако вашите мисли природно се движат кон таа личност и сакате подобро да ја запознаете, постои потенцијал за следење.

Конечно, важен индикатор е чувството за автентичност – ако можете веднаш да се опуштите со некого и да бидете себеси без да се преправате, тоа е врска што вреди да се истражи понатаму.