Жените кои се подготвуваат за ин витро оплодување (ИВФ) може да имаат поголеми шанси за спонтана бременост ако ослабат. Сепак, не е јасно дали ова губење на тежината ја зголемува стапката на успех на самото ИВФ, покажа нова анализа на 12 претходни студии.

Според студијата на истражувачите од Универзитетот во Оксфорд, објавена во „Аналите на интерна медицина“, интервенциите за слабеење, вклучувајќи диета со намален внес на калории, физичка активност со совети за исхрана, како и употреба на лекови, покажале придобивки кај паровите кои зачнале природно, без потреба од ин витро оплодување, објави „Ројтерс“.

Сепак, не е докажано дека овие пристапи значително ја зголемуваат стапката на успех на ин витро оплодувањето. Исто така, ниту еден метод за слабеење не е покажан како значително поефикасен од друг.

Авторите истакнаа дека споредувањето на резултатите е тешко поради малиот број испитаници и разликите во методот на тестирање.

Во исто време, губењето на тежината не била поврзана со зголемен ризик од спонтан абортус.

Во воведот на студијата, Алан Пензиас од Медицинскиот факултет Харвард предупредува дека иако губењето на тежината кај луѓето со прекумерна тежина има познати здравствени придобивки, одлуките за ин витро оплодување треба да ги земат предвид и факторите што губењето на тежината не може да ги промени, како што е намалувањето на плодноста поврзано со возраста.

„Веќе знаеме дека губењето на тежината може да помогне со плодноста, но дали тоа ги подобрува шансите за ин витро фертилизација е многу помалку познато. Оваа студија фрла малку светлина, но е мала студија со преголем ризик од пристрасност, па затоа треба да бидеме претпазливи во врска со резултатите. Ин витро фертилизацијата ги надминува многу од бариерите поврзани со дебелината, но сè уште не е јасно дали одложувањето на третманот за губење на тежината може да ги подобри шансите“, изјави за „Центарот за научни медиуми“ (Science Media Centre) Јинг Чонг, професор по репродуктивна медицина на Универзитетот во Саутемптон.