Несреќата што Марк Цукерберг ја имаше на тренинг за боречки вештини го испрати извршниот директор на Мета на операционата маса. Генералниот директор на „Мета“ и вљубеник во боречките вештини објави на социјалните мрежи дека скинал еден од предните вкрстени лигаменти додека тренирал за мечот закажан за почетокот на следната година, пренесува РТС.

Фотографијата што ја објави на Инстаграм го прикажува милијардерот како лежи во болнички кревет со левото колено нагоре, преврзано и со протеза.

„Ги скинав лигаментите и штотуку имав операција. Благодарен сум на лекарите и на тимот што се грижат за мене. Тренирав за натпреварувачка ММА борба на почетокот на следната година, но сега тоа е на чекање. Сè уште со нетрпение чекам да го направам тоа откако ќе се опоравам. Ви благодариме на сите за вашата љубов и поддршка“, објави Цукерберг на Инстаграм.

Основачот на „Фејсбук“ и Илон Маск летово беа во фокусот на јавниот интерес, откако на крајот на јуни договорија лична пресметка. Двајца од најистакнатите светски технолошки милијардери се согласија да се борат меѓу себе во арената за ултимативна борба во октагонот во Вегас.

Маск во еден момент изјави дека се подготвува со кревање тегови. Но, во август, извршниот директор на Tesla објави на социјалните мрежи дека можеби ќе му треба операција пред пресметката.