Во рамки на програмата „Македонски филм. На големо платно“, што се реализира по повод 20-годишниот јубилеј на Агенцијата за филм, на 11 мај, со почеток во 19 часот, во киното „Синеплекс“ публиката ќе има можност да проследи селекција од четири наградувани кратки македонски филмови.

На програмата се „Човекот со чудна навика да ме мава со чадор по глава“ на Вардан Тозија, „Намини бар еднаш“ на Косара Митиќ, „Борба за смрт“ на Елеонора Венинова и „Пепи и Муто“ на Георги М. Унковски.

Мајската програма на проектот „Македонски филм. На големо платно“ на Агенцијата за филм беше отворена на 4 мај со проекција на филмот „Преекспонирано“.

Пред проекцијата на филмот во „Синеплекс“ филмскиот новинар Игор Анѓелков имаше разговор со сценаристката и режисерка Елеонора Венинова и монтажерот и продуцент Гоце Кралевски, со цел приказната во филмот да се доближи до публиката.

Во текот на мај ќе следуваат и проекции на долгометражните играни филмови „Мајки“ на Милчо Манчевски, на 18 мај, и „М“ на Вардан Тозија, на 25 мај. Влезот на сите проекции е бесплатен.