Бугарската јавност е скептична во врска со воведувањето на еврото како национална валута од 1 јануари 2026 година, но Европската Унија има утешна порака – еврото е вашиот ангел чувар во опасен свет. Само околу половина од населението го поддржува приклучувањето кон единствената валута, бидејќи стравот од инфлација и централизацијата на моќта во Брисел и Франкфурт ги сврти многу граѓани против проектот. Во обид да ги ублажат овие загрижености, економскиот комесар Валдис Домбровскис и претседателката на Европската централна банка, Кристин Лагард, ги истакнаа геополитичките придобивки од приклучувањето кон еврозоната.

– Бугарија се приклучува кон еврото во време кога светот е понестабилен, кога се соочуваме со низа последователни шокови и кога глобалниот поредок, каков што го знаевме, е сè пофрагментиран и веројатно има помалку пријатели – рече Лагард.

Лагард нагласи дека за време на финансиската криза, еврото се покажа како одбранбен штит од шокови и девалвација. Домбровскис додаде дека самиот факт на усвојување на еврото може да ѝ помогне на Бугарија да ги намали геополитичките ризици во очите на инвеститорите.

– Во балтичките земји, иако се геополитички изложени, трошоците за задолжување беа пониски отколку во Полска – главно затоа што инвеститорите го сметаа еврото за фактор на стабилност – рече таа.

Влезот на Бугарија во Еврозоната е планиран повеќе од една деценија, но како што се приближува датумот, стравувањата растат. Западот ја обвини Русија за финансирање кампањи на социјалните медиуми насочени кон поткопување на поддршката за еврото во Бугарија, како и за водење „хибридна војна против Европа и земјите членки на ЕУ“- пишува Каматица.