Бугарските пратеници денеска ќе расправаат за второто гласање за недоверба на кабинетот Желјазков, се наведува во нацрт-програмата за работа на парламентот, објавена на веб-страницата на Народното собрание.

Предлогот беше поднесен минатата недела – на 10 април, на иницијатива на пратеничката група „Морал, единство, чест“ (МЕЧ) со потписи и на „Преродба“ и на „Величие“. Гласањето е за корупција во четири-пет секторски политики, меѓу кои и „Боташ“, односно за штетниот договор со турската државна компанија за гас поради кој Бугарија има акумулирано милионски долгови кон Турција за транспорт на течен гас.

Според деловникот на Собранието, расправата за предлог-резолуцијата за гласање недоверба започнува најрано три дена и најдоцна 7 дена од приемот на предлогот. Гласањето е најрано 24 часа по завршувањето на расправата и се очекува да се одржи во четврток.

Вчера доцна попладне, партијата „Демократија, права и слободи“ -ДПС заседаваше и одлучи да го напушти владиното мнозинството. Таква средба имаше и пред првото гласање за недоверба, но тогаш формацијата изјави дека ќе продолжи да го поддржува мнозинството додека не се објави извештајот за конвергенција за Бугарија. Вчера, пак, од ДПС – ДПС потсетија дека биле поканети во владејачкото мнозинство како гарант на политичката стабилност и да придонесат за демонтирање на моделот „Пеевски“. Нешто што, според нив, досега не се случило. Од „Демократија, права и слободи“ – ДПС изјавија и дека сериозно ќе размислат дали да го поддржат второто гласање за недоверба.

Веднаш реагираа ГЕРБ-СДС, „БСП-Обединета левица“ и „Има таков народ“. Во заедничко соопштение до медиумите, трите партии најавија дека остануваат посветени на потребата Бугарија да има редовна Влада која спроведува политики кои го поддржуваат владеењето на правото, конкурентноста на економијата, безбедноста, заштитата и социјалните права на граѓаните.