Британскиот музеј успешно го откупи златниот приврзок во облик на срце поврзан со Хенри VIII кој бил дел од династијата Тјудор и неговата прва сопруга Катерина Арагонска, откако собра 3,5 милиони фунти преку јавни донации и средства.

Артефактот од 16 век, откриен во 2019 година во Ворикшир од човек кој користел детектор за метал, сега ќе биде во јавната колекција, пренесува „Скај њуз“.

Повеќе од 45.000 граѓани придонесоа за собирање средства, соопшти музејот, а најголемиот придонес е од Националниот фонд за споменици на наследството (1,75 милиони фунти). по што следуваат Фондот „Џулија Раусинг“ (500.000 фунти) и Американските пријатели на Британскиот музеј (300.000 фунти).

Британскиот музеј планира да го вклучи златниот приврзок, познат како „Тјудорско срце“, во својата постојана колекција и да го изложи на идна турнеја низ Велика Британија.