Британската инфлуенсерка Брук Џорџ е обвинета за убиство на Британец во нејзиниот стан во Обединетите Арапски Емирати, откако наводно била злоупотребена од него. Таа е обвинета за убиство со предумисла и, доколку биде осудена, се соочува со смртна казна, објави „Телеграф“.

Џорџ тврди дека дејствувала во самоодбрана откако човекот, кого го запознала на Фејсбук, станал насилен и постојано ја напаѓал.

Нејзиното семејство вели дека таа ги контактирала „во состојба на паника“ откако постојано била удирана од човекот. Таа пробала да испланира лет до дома, само за да открие дека нејзиниот љубовник ѝ го крие пасошот. Откако таа го молела да ѝ го врати пасошот, наводно била удирана по лицето и го избодела со кујнски нож во самоодбрана.

Брук била уапсена на аеродромот на 22 јуни, кога се обидела да избега од ОАЕ, вели семејството.

„Длабоко сум загрижена за нејзината благосостојба. Ќерката со која разговарав таа вечер беше крајно преплашена. Цврсто верувам дека очајно се обидувала да се врати дома и да се оддалечи од она што ѝ се случило“, изјавила Тереза ​​Џорџ, мајката на Брук.

„Притворен во Дубаи“ (Detained in Dubai), група за човекови права, тврди дека таа добила малку објаснување за постапката поради јазичната бариера и дека е лишена од пристап до нејзината амбасада и принудена да дава изјави во отсуство на адвокат.

Радха Стирлинг, извршен директор на „Притворен во Дубаи“, посочила дека случајот „покренува сериозна загриженост за насилството врз жените, правото на самоодбрана, правичното судење и третманот на британските државјани притворени во странство“.

Стирлинг, исто така, истакнала дека во последниве години има сè повеќе извештаи за жени кои се „намамени во Дубаи со ветувања за луксузен животен стил, платена работа, одмори или романтични врски, кои подоцна биле подложни на сексуална експлоатација, принуда, насилство или друг понижувачки третман“.

„Брук тврди дека дејствувала само откако била изложена на насилен напад и од вистински страв за својата безбедност. Таа треба да се третира не само како обвинето лице, туку како претпоставена жртва на насилство чии наводи и документирани повреди заслужуваат соодветна истрага. Наместо да ја третираат Брук исклучиво како осомничена за убиство, истражителите мора да испитаат и дали е жртва на сериозно насилство и можна експлоатација. Треба да ѝ се обезбеди заштита, соодветна медицинска нега, правно застапување и непосредна британска конзуларна помош додека истрагата продолжува“, рекла таа.