Британското Министерство за надворешни работи предупреди дека не може да се исклучи можноста за терористички напад на Кипар, откако ги ажурираше официјалните препораки за патување кон островот, пренесуваат британските медиуми.

Во новите насоки се наведува дека постои глобално зголемена закана од тероризам која може да ги погоди британските интереси и британските државјани во странство.

„Терористички напади на Кипар не може да се исклучат“, стои во ажурираните препораки на британското Министерство за надворешни работи.

Министерството дополнително предупреди дека заканите може да доаѓаат од организирани групи, но и од поединци кои ги сметаат Обединетото Кралство и неговите граѓани за потенцијални цели.

Во документот се наведува дека британските граѓани треба постојано да бидат внимателни и свесни за својата околина, особено на јавни места и туристички локации.

Засега нема информации за конкретна закана или планиран напад, но ажурирањето на препораките доаѓа во време на зголемени безбедносни тензии во поширокиот регион.