Двајца сопружници од Шпанија кои заедно преживеаја 65 години, отпуштени се заедно од една од мадридските клиники откако и двајцата успеаја да се излечат од Ковид – 19, пишува Паис.

Како што наведува весникот, Хосе Прието Серудо и Гвадалупе Матас Ернандес се венчале во 1955 година и имаат седум ќерки.

Хосе на 4. март бил на лекар поради силна кашлица, па му препишале антибиотици и го пуштиле дома.

На 8. март семејно ја прославиле 65 годишнина од венчавката, а веќе следниот ден Хосе е примен во болница во Мадрид поради висока температура и силни главоболки. Тестот за коронавирус бил позитивен.

По неколку дена и неговата сопруга добила слични симптоми, па и таа е упатена во истата болнциа. И покрај правилата дека пациентите мора да бидат во одвоени соби, на оваа брачна двојка им е дозволено да бидат заедно.

Дури и кога Гвадалупе се опоравила и можела да биде отпуштена, таа одбила изјавувајќи дека нема да отиде од таму без мажот.

На 30 март и двајцата конечно можеа да ја напуштат болницата и да се вратат дома.