Претседателот на Евролигата, Дејан Бодирога, се збогува со легендарниот тренер Душко Вујошевиќ, кој почина денес на 68-годишна возраст, истакнувајќи дека европската и српската кошарка загубија еден од своите најважни експерти.

„Европската и српската кошарка загубија еден од најстрастните умови и најпосветените учители. Вујошевиќ беше човек на кошарката, ментор и симбол на интегритет и посветеност на играта. Неговото влијание обликуваше генерации играчи и тренери, оставајќи неизбришлив белег во нашиот спорт“, рече Бодирога, како што објави Евролигата.

Тој изрази сочувство до семејството, пријателите на Вујошевиќ и до сите што имаа можност да работат со него.

„Неговото наследство ќе живее на секој терен, во секој тим и во секој млад играч кој ја продолжува својата љубов кон кошарката“, рече претседателот на Евролигата.

Евролигата објави дека преостанатите натпревари од 36. коло, како и сите натпревари од 37. коло, ќе започнат со минута молчење.

„Пред вечерашните натпревари и мечевите од 37. коло ќе има минута молчење во чест на Вујошевиќ и неговото неверојатно наследство“, се вели во соопштението на Евролигата.