Наместо досегашните четири часа, грчките земјоделци од 17 часот по македонско време започнаа подолга, шестчасовна блокада на граничниот премин „Евзони“-„Богородица“.

Ова значи дека границата ќе биде затворена до полноќ вечерва, за сите возила.

Според најавите, секоја наредна блокада ќе трае шест часа, по што граничниот премин ќе биде шест часа отворен итн.

На граничниот премин „Ники“-„Меџитлија“, како што претходно извести АМСМ, има забрана за камиони, која ќе трае до утре до 10 часот.

Протестите на земјоделците во Грција започнаа на 30 ноември и траат над 40 дена со секојдневни блокади на низа локации во целата земја.