Во чест на 81 година постоење на Народен театар Битола, на сцената на театарот од 14 до 21 ноември ќе оживеат вечните дела на Вилијам Шекспир – во интернационален театарски дух и со врвни продукции од Македонија и од светот.

Својот роденден Битолскиот театар ќе го прослави со премиера и со почеток на 11-тото издание на „Битола Шекспир фестивал“, кој ќе биде отворен со премиера на „Макбет“ – НУ Народен театар Битола, Македонија, на 14 ноември, додека на Шекспир-фестивалот ќе гостуваат претстави од Македонија, Полска, САД, Хрватска / Англија и Бугарија.

На програмата на фестивалот се претставите: „Дванаесеттата ноќ“ – Драмски театар „Александар Венгерко“, Бјалисток, Полска, во режија на Игор Горжковски на 15 ноември; „Крал Лир“ – „Lit Moon Theatre“, САД, во режија на Џон Блондел (17 ноември); „Еволуцијата на распадот“ – Театарско здружение „Артема театарска лабораторија“, Скопје, Македонија, во режија на Дамјан Димовски (18 ноември); кореодрама „Само ти (и) ја / Only You (and) I“ – Здружение на граѓани „Тим Театрос К“, Скопје , Македонија, во режија на Војо Цветановски (19 ноември, со почеток во 20 часот); „Ричард III“ – НУ Народен театар Битола, Македонија, во режија на Мартин Мирчевски (19 ноември, со почеток во 21 часот); „Јас Писблосом / I, Peaseblossom“ – „Hani-Tong Theatre“, Хрватска / Англија, во режија на Филип Пар, монодрама базирана на извонредната ревизија на Шекспировата „Сон на летната ноќ“ од Тим Крауч (на 20 ноември); „Како што милувате / As You Like It“ – Драмски театар „Стојан Бачваров“, Варна, Бугарија, во режија на Габор Томпа од Романија (21 ноември).

Театарот повторно ќе стане место на љубов, борба, страст и бесмртни приказни на 11-тото издание на „Битола Шекспир фестивал“. Освен за премиерата на „Макбет“ на 14 ноември, влезот на сите други претстави е бесплатен со претходна резервација на билет.