Владејачкото мнозинство го изгласа Законот за прекршоци иако против се изјасни целата опозиција освен пратениците на Левица. И покрај тоа што ДУИ ја откажа претходно дадената поддршка за законот, на лидерската средба, власта успеа да обезбеди двотретинско мнозинство и со тоа системот „Безбеден град“ ќе може да стартува од 1 февруари.

„За“ гласаа 81 пратеник, „против“ беа 19, додека немаше „воздржани“ пратеници. Беше побарано и поединечно гласање, при што повторно законот ја доби истата поддршка.

Пред гласањето на законот Левица потврди дека ќе даде поддршка, додека двете Алијанси за Албанците на Арбен Таравари и на Зијадин Села, како и Европскиот фронт и СДСМ се изјаснија дека ќе гласаат против законот.

Главните забелешки на опозицијата се дека пораките за прекршоци не се испраќаат и на албански јазик, дека законот е дискриминирачки бидејќи ќе се казнуваат возачите само во Скопје, Тетово и во Куманово, но и дека законското решение не предвидува контрола на податоците на граѓаните од имејл адресите и телефонските броеви, како и на снимките.

ДУИ се пишмани, виси стартот на системот „Безбеден град“ – Слободен печат