Барселона сака да го доведе Влаховиќ
Фудбалскиот клуб Барселона е заинтересиран за напаѓачот на Јувентус и српски репрезентативец Душан Влаховиќ, пренесува шпанска „Марка“.
Препорачано
Според овој извор, каталонскиот клуб веќе направил прв чекор и стапил во контакт со Влаховиќ, кој има договор со Јувентус до 30 јуни 2026 година.
„Ова е прв контакт, бидејќи Барселона сака да ја искористи ситуацијата што се создаде на пазарот. Отворениот конфликт минатото лето меѓу Влаховиќ и Јувентус заврши без продолжување на договорот, но играчот се врати на терен знаејќи дека влегува во последната година од договорот. Целта е фудбалерот на крајот од сезоната да дојде без обесштетување или под многу поволни услови да пристигне уште во зимскиот преоден рок“, наведува „Марка“.
Исто така, се истакнува дека Барселона веќе подолго време работи на пронаоѓање замена за Роберт Левандовски, кој сè уште нема продолжено договор со клубот. Полскиот напаѓач би можел да ја напушти Барселона по завршувањето на сезоната.
Влаховиќ во моментов се опоравува од повреда, а на теренот би можел да се врати во март следната година. Оваа сезона српскиот фудбалер има одиграно 17 натпревари за Јувентус и постигнато шест голови.
Пред настапите за Јувентус, Влаховиќ играше за Фиорентина и Партизан.
