Претседателите на Литванија, на Полска и на Романија ќе побараат од лидерите на Европската унија (ЕУ) да понудат пакет на економска поддршка за Белорусија на Самитот што ќе се одржи оваа недела, објави денеска литванскиот претседател, Гитанас Нуседа.

Според соопштението, пакетот ќе вклучува повластен трговски режим со ЕУ, безвизен режим и поддршка за преговори за влез во Светската трговска организација (СТО) и насловен е „поддршка за демократска Белорусија”.

Дел од договорот е поддршка на реформите и на диверзификација на енергетскиот сектор, како и за транзиција кон либерална економија.

Полскиот премиер Матеуш Моравјецки минатата недела изјави дека земјата сака ЕУ да понуди најмалку една милијарда евра за Белорусија како дел од „Маршаловиот план”.