Србија и Украина се подготвени да потпишат меморандум за разбирање во областа на европската интеграција, што ќе биде нов чекор во зајакнувањето на билатералната соработка и парламентарните врски, изјави претседателката на Народното собрание на Србија, Ана Брнабиќ, на прес-конференција во Киев по средбата со претседателот на Врховната рада на Украина, Руслан Стефанчук, објави руски ТАСС.

Според Брнабиќ, српскиот претседател Александар Вучиќ и неговиот украински колега Володимир Зеленски одржуваат „одлична комуникација“ и „се во редовен контакт“, објавува рускиот медиум.

„Последниот пат кога разговараа беше минатата недела. Ја поддржавме Украина со значителна хуманитарна и финансиска помош, повеќе од целиот регион на Западен Балкан заедно“, додаде таа.

Брнабиќ потсети дека сопругата на српскиот претседател, Тамара Вучиќ, „често го посетува Киев“, ја посети украинската престолнина „четири пати во последните две години“.

Брнабиќ ја нарече својата посета на Киев „сигнал за континуирано зајакнување и интензивирање на соработката меѓу двата парламента и земјата“ и го покани Стефанчук да го посети Белград.

„Космомолскаја правда“ ја пренесува изјавата на Брнабиќ дека „Украина е пријател на Србија. Особено го цениме фактот што Украина го почитува територијалниот интегритет на Србија“.

Според неа, Србија целосно ја поддржува интеграцијата на Украина во Европа.

Порталот News.ru, со информациите за пристигнувањето на Брнабиќ во Киев, пишува дека претходно, Александар Вучиќ, претседателот на Србија, изјавил дека властите го контролираат извозот на муниција произведена во земјата, иако понекогаш српско оружје сè уште се наоѓа во Украина.

Вучиќ истакна дека Белград сè уште балансира помеѓу економската потреба за продажба на оружје и желбата да се одржи неутралност во конфликтот меѓу Москва и Киев.