Еден Азар од лето ќе биде нов играч на Реал Мадрид, објавува шпанскиот весник „Марка“. Според весникот кој никогаш не греши кога станува збор за информации поврзани со Реал Мадрид, Азар веќе ги договорил личните услови со „кралскиот клуб“ и ќе потпише шестгодишен договор, а Челси ќе добие 100 милиони евра како обесштетување.

Старо-новиот тренер на Реал Мадрид, Зинедин Зидан, го означи Еден Азар како главна ѕвезда околу која ќе го гради новиот тим на „кралскиот клуб“ со кој повторно ќе атакува на трофеите во Шпанија и во ЛШ.

Азар кој сезонава постигна 17 голови и има 12 асистенции за Челси и цели кон трофејот во Лигата на шампионите, веќе почнал да бара куќа во Мадрид и е убеден дека од следната сезона ќе биде трениран од својот идол, Зинедин Зидан.

Освен Азар, нов играч на Реал Мадрид во следната сезона ќе биде и Едер Милитао од Порто, кој веќе го потпиша договорот, а пред потпис е и фудбалерот на ПСЖ, Адриен Рабио. Следна цел на Зидан е ѕвездата на Манчестер јунајтед, Пол Погба, кој исто така има желба да се пресели во Мадрид, но реализацијата на тој трансфер ќе биде многу потешка.