Книгата за деца со наслов „Полжавчето што си го најде патот“ од Билјана Лотеска е најчудното и најоригиналното издание кај нас и во светот. Издавач на книгата е „Едука Мак“ од Скопје, издавачката куќа специјализирана за издавање на литература за деца и млади.

Во книгата „Полжавчето што си го најде патот“ текстот се чита од средината надесно или налево и обратно. Детето само го избира патот по кој ќе појде да ги чита двете исти, а во основа толку различни приказни, обединети во една книга што завршува со среќен крај.

„Ова е книга што не се чита, туку се доживува и поучува бидејќи детето е поставено во активна улога на креатор, истражувач и носител на одлуки, кои подоцна стануваат составен дел од неговиот секојдневен живот, а родителот ја има улогата на поддржувач и помошник на своето дете, при читањето. Затоа што секое читање отвора нова возбуда, секој пат носи нова емоција и секое дете на приказната ѝ дава свој уникатен крај“, истакнува авторката Билјана Лотеска.

Преку оваа нежна, исклучително терапевтска приказна, децата природно учат за храброст, трпеливост, добрина и самодоверба и уште многу нешта, станувајќи активен дел од раскажувањето. Ова е книга што поттикнува на самостојност, ја развива емоционалната интелигенција и ја претвора приказната во интерактивно патување. Поради ова, таа е и најчудната книга објавена во Македонија. Во тоа максимално помагаат и оригиналните илустрации од Бисера Лотеска.

„Полжавчето што си го најде патот“ е трета книга на писателката Билјана Лотеска. Првата книга што ја објави со наслов „Жолти чорапи“ беше најпродавано издание на издавачот „Арс Ламина“, а истата издавачка куќа ги објави и нејзините два прирачника за работа во воспитните групи на деца со наслов „Детска планета“ за 3-4 години и „Детска планета“ за 5-6 години. По ова, Лотеска ја објавува и книгата „Пчеличката Баз“ наменета, исто така, за децата, во издание на издавачката куќа „Едука Мак“.

Оттука, таа сето свое знаење како воспитувач и психолог го преточи и во новата книга „Полжавчето што си го најде патот“ наменета за радосно и успешно растење на децата во ова мошне динамично време на живеење, што, пак, ја прави оваа книга уште позначајна за децата заради својата терапевтска улога.

(Текстот е објавен во „Културен печат“ број 332, во печатеното издание на весникот „Слободен печат“ на 16-17.5.2026)