Австриската Влада донесе одлука за воведување на таканаречен „Зелен пасош” на 19 мај, што ќе го спроведе во три фази.

Првата фаза од воведувањето на овој електронски документ, што треба да овозможи повеќе слободи за време на пандемијата, ќе биде обичен доказ за вакцинација, негативен тест или прележан коронавирус.

Околу две до три недели подоцна, тој ќе биде национално применет со QR-код, по што се чека европско решение.

Австрискиот канцелар Себастијан Курц, при објавувањето на планот за ублажување на мерките, рече дека, во врска со „Зелениот пасош”, со кој треба да се врати слободата на патување, Австрија не сака да ја чека ЕУ, туку ќе го воведе на национално ниво од 19 мај.

Сепак, неговата најава се однесува првенствено на електронски документ што ќе им овозможи на луѓето кои биле вакцинирани, прележале коронавирус или се тестирани да посетуваат настани, гастрономија и хотели во Австрија.

Во втората фаза, австриската Влада сака доказите за вакцинација, прележан коронавирус и негативен тест да бидат поврзани со QR-код, што би се случило на почетокот на јуни, така што оттогаш би можело да се зборува за австриски „Зелен пасош”.

Откако ЕУ ќе постигне договор за европската верзија на тој пасош, што ќе го регулира туризмот во текот на летото, Австрија ќе го приспособи своето решение на заедничкото.

Според планот на австриската Влада, луѓето кои ќе ја примат првата доза на вакцина, по три недели, ќе можат да вратат одредени слободи.

Во другите земји на ЕУ, тој рок, според сегашното размислување, е јасно покус.

Во ЕУ е спорно и кои вакцини се сметаат за веродостојни, односно дали вакцините што не се одобрени од Европската агенција за лекови (ЕМА) ќе бидат прифатени.