Променливото време на почетокот од седмицата донесе и нови врнежи од снег и на пониските места, но и ја зголеми снежната покривка и на планините што е добро од хидролошки аспект и влева надеж за полнење на акумулациите, кои се на многу ниско ниво.

Во останатиот дел од седмицата стабилното и суво време со утрински температури околу 0 степени Целзиусови или негативни но блиску до нулата, како и дневни температури кои достигнуваа вредности и до 13 степени, во овој период од годината е добредојдено за изведување на работи во поле како што е кроењето на лозјата и резидбата на овошките.

Во наредната седмица се очекува стабилизирање на времето, со повремена облачност во првата половина од седмицата и услови за повремен дожд во втората половина, особено во четврток.

Утринските температури ќе бидат позитивни со вредности од 1-6 степени Целзиусови додека дневните се очекува да се движат од 8-14 степени во јужните делови.

Ваквите временски услови ќе им овозможат на земјоделците да ги вршат и понатаму резидбите на виновата лоза и овошките, припрема на површините во пластеничкото проиводство и евентуално прихранување на есенските посеви.