Асоцијацијата на приредувачи на игри на среќа – АПИС апелира дека подолг временски период на социјалните мрежи масовно циркулираат лажно креирани дигитални вести кои имаат за цел да ги доведат граѓаните во заблуда, особено младите како најактивни корисници на овие платформи.

Од АПИС велат дека станува збор за онлајн измама преку која, според нив, свесно и со умисла пласира невистинити информации дека компаниите-членки на Асоцијацијата наводно приредуваат онлајн игри на среќа.

„Сакаме јасно да ставиме до знаење дека казината „Фламинго“ (Гевгелија и Скопје), „Гранд Казино Адмирал“, „Луксор“, како и автомат клубовите „Астра“, „Адмирал“, „Апекс“, „Моцарт„ и „Спортлајф“ НЕ приредуваат онлајн игри на среќа, согласно македонското законодавство“, нагласуваат од АПИС.

Тие додаваат дека лажните вести претставуваат обид за злоупотреба на корпоративниот углед на нивните членки и апелираат граѓаните да се информираат исклучиво преку официјалните комуникациски канали на компаниите.

АПИС информира дека ги презема сите неопходни законски дејствија за заштита на брендовите на своите членки и очекува надлежните државни институции да постапат соодветно со цел спречување на вакви негативни и штетни појави.