Државната комисија за спречување корупција (ДКСК) направила анализа на процесот на носење одлуки и на самото склучување на Договорот за градба на коридорите 8 и 10Д со „Бехтел и Енка“. Анализата покажала низа пропусти поради што ДКСК на вчерашната седница донела одлука нивните забелешки да се достават до Основното јавно обвинителство.

Супервизија: Министерството за транспорт и врски досега префрлило 189 милиони евра за автоапатите што ги гради „Бехтел и Енка“

Членот на ДКСК, Катица Николовска, изјави дека доказите што ги обезбедиле во текот на постапувањето, ги натерале да направат анализа за состојбите и за постапувањата на државните органи при носењето одлуки, при носењето на законот и склучувањето на Договорот.

– Меморандумот е потпишан, но јавно не е објавен досега. Потоа, група пратеници поднесува предлог-закон и по 15 дена се носи во Собранието. Тој се применува како „лекс специјалис“ и исклучува примена на други закони. Ваквото постапување на Владата упатува на усогласено постапување и низа активности, со цел обезбедување незаконски поволности. Активностите на владини претставници во согласност со нивните наводи за склучување на договорот, може да се оценат како спротивни на законот за лобирање – изјави Николовска.

Николовска вели дека има сомнеж за потенцијална корупција со самото тоа што договорот за градење 109 километри автопат е во вредност од 1,3 милијарди, а е со ознака доверливо.

– Договорот со „Бехтел и Енка“ што го баравме од Владата, по голем број преписки го добивме, но не целосно. Без голем број анекси. Од таа причина не навлеговме во оценка на договорот во целост – изјави Николовска.

Постојат, нагласи Николовска, индиции за несоодветно и незаконско постапување на одредени лица.

„Бехтел и Енка“ почнува со градежни работи на Коридорот 8