Американските разузнавачки служби имаат во посед големи количини на податоци кои би можеле да бидат одговорот на мистеријата за потеклото на коронавирусот, дознава Си-Ен-Ен. Службите детално ги разгледуваат податоците, но најпрвин тие треба да ги дешифрираат. 

Тој огромен каталог на информации содржи генетски податоци добиени од примероци во лабораторијата во Вухан, градот од кој коронавирусот започна да се шири низ светот, потврдија изворите за Си-Ен-Ен.  

Многу од тие американски експерти сметаат дека вирусот излегол токму од таа лабораторија. 

Сѐ уште не е јасно како американските разузнавачи ги добиле тие податоци, но Си-Ен-Ен наведува дека компјутерите преку кои се создаваат и обработуваат таквите бази на податоци се поврзани со сервери базирани на „клауд технологии“, алудирајќи на можноста тие да биле пробиени. 

Си-Ен-Ен потсетува дека американските службеници поставиле рок од 90 дена за да го откријат потеклото на коронавирусот. Тие се надеваат дека прегледот на информации од Кина ќе помогне да се одговори на клучните прашања: како вирусот се пренел од животно на човек? Одговорот на тоа прашање е клучен за конечно да се утврди дали коронавирусот „протекол“ од лабораторија или природно преминал од животни на луѓе, велат изворите на Си-Ен-Ен. 

Високите американски службеници сѐ уште се поделени помеѓу две теории за потеклото на короната, и можни се комбинации на две теории – оние за лабораторијата и оние за природното ширење на вирусот. 

Си -Ен -Ен минатиот месец објави дека високи претставници на администрацијата на Бајден, кои ја надгледуваат истрагата за потеклото на корона, веруваат дека теоријата за вирус што случајно се шири од лабораторијата во Вухан е барем исто толку веродостојна како и теоријата дека вирусот потекнува од природата.